ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်တွင် နေထိုင်ကြသော တိုင်းရင်းသားများသည် မိုးစပါးရိတ်သိမ်းပြီးပါက လယ်ယာမြေများကို ထွန်းယက်၍ မြေကိုပြုပြင်ပြီး ဆောင်ရာသီး၌ စိုက်ပျိုးလေ့ရှိသည့် ဖရဲသီး သီးနှံကို တစ်ပိုင်တစ်နိုင် စိုက်ပျိုးကြပါသည်။ ယခုနှစ် စိုက်ပျိုးကြသည့်ကျေးရွာ၊ အုပ်စုများမှာ ကတ်တောင်၊ ယန်းကျိန်၊ ယန်းလှ၊ ကတ်ဖအုပ်စုများတွင် အများဆုံးစိုက်ပျိုးကြကြောင်း သိရပါသည်။
   နှစ်စဉ် ဒီဇင်ဘာလ၊ ဇန်နဝါရီလတွင် ဖရဲသီးပင်များကို စိုက်ပျိုးကြပါသည်။ ဖရဲသီးကို စိုက်ပျိုးရာတွင် 855 ဟိုက်ဘာ၊ 842 ဟိုက်ဘာ မျိုးစေ့များကို (၄)နာရီခန့် ရေစိမ်ပြီး အခြောက်ခံကာ မျိုးစေ့များကို ဘောင်စနစ်များဖြင့် ၅'ပေ ၆'ပေ အကွာစိုက်ပျိုး၍ ရက်ပေါင်း(၉၀) ခန့်တွင် ထွက်ရှိကြောင်း သိရှိရပါသည်။ တစ်ဧကစိုက်ပျိုးမှုအတွက် မြေပြုပြင်ခြင်း၊ သွင်းအားစုများ မျိုးစေ့ဓာတ်မြေဩဇာ၊ မြေဆွေး၊ နွားချေး၊ ပိုးသတ်ဆေး၊ ရေလောင်း၊ အပင်အုပ် ပလပ်စတစ်၊ လုပ်သားခ စသည်တို့သည့် ယခုနှစ် တစ်ဧကလျှင် စုစုပေါင်း (၄၁) သိန်းခန့် ကုန်ကြကြောင်း သိရှိရပါ သည်။
   ၂၀၂၆ ခုနှစ် မတ်လတွင် ထွက်ရှိသော ဒေသဖရဲသီးများသည် တစ်ဧကလျှင် ဖရဲသီးလုံးပေါင်း ပျှမ်းမျှ(၂၁၀၀-၂၅၀၀) ခန့် ထွက်ရှိကြောင်း သိရှိရပါသည်။ ဒေသထွက်သော ဖရဲသီးများကို ကျိုင်းတုံမြို့မဈေး၊ အာခါဈေးနှင့် ယန်းခမ်းဈေးတို့၌ အရွယ်အစားပေါ်မှုတည်၍ လက်ကားဈေးနှုန်း ဖရဲသီး (၁) လုံးလျှင် (၄၀၀၀) ကျပ်မှ (၈၀၀၀) ကျပ်ခန့်ဖြင့် ဖြန့်ဖြူးရောင်းချကြောင်း သိရပါသည် ဖရဲသီးရောင်းရငွေမှာ လက်ကားဈေးအနိမ့်ဆုံး (၄၀၀၀) ကျပ်ဖြင့်တွက်လျှင် (၈၄) သိန်းခန့် ရရှိ၍ တစ်ဧက၏ အထွေထွေကုန်ကျစရိတ်မှာ (၄၁) သိန်းနုတ်လျှင် ဖရဲသီးစိုက်ပျိုးသည့် တောင်သူကြီးများအနေဖြင့် တစ်ဧကကို အကျိုးအမြတ် (၄၃) သိန်းခန့် ရရှိကြောင်းသိရှိရပါသည်။
Source: https://www.doca.gov.mm